CEBU, Philippines - Malaumon si Cebu City Mayor Michael Rama nga maimplementar na sunod tuig ang uban pa’ng concreting project nga ubos sa Department of Tourism-Department of Public Works and Highways (DOT-DPWH) Convergence Program. Ang mga karsada nga ubos sa maong proyekto agianan kini sa tourism sites. Sa P293 milyones nga DOT-DPWH Convergence Program, P155 milyones lang ang naaprobahan.
“It is good than nothing,” matud ni Rama.
Ang mga karsada nga naaprobahan ubos sa maong proyekto mao ang A. Soriano, D. Gaisano, B. Benedicto ug 13th Avenue sa barangay Carreta, Don Leon Kilat sa Kalubihan ug Doña Modesta sa Lahug.
Ang mga karsada nga gilauman sa kagamhanan sa siyudad nga maaprobahan na sa sunod tuig mao ang Legazpi extension sa San Roque, N.G. Escario sa Kamputhaw, T. Padilla Street ug E. Sabellano sa Punta Princesa.
Sa milabay’ng mga buwan, si DPWH Secretary Rogelio Singson mibutyag nga mokabat ngadto sa usa ka bilyon ka pesos ang gigahin nga pundo sa nasudnong kagamhanan alang sa infrastructure projects sa Sugbo. Ang nasudnong kagamhanan migahin og P356 milyones alang sa road concreting ug asphalt overlay ubos sa DOT-DPWH Convergence Program. (BANAT NEWS)