Kaso sa dengue SA CV niubos

CEBU, Philippines - Gipahibawo sa Regional Epidemiology and Surveillance Unit sa Department of Health-7 nga ubos gihapon ang gidaghanon sa kaso sa dengue sa Central Visayas itandi sa niaging  tuig.

Matud ni Rennan Cimafranca sa RESU-7 nga 80.5 porsiyento ang pag-us-os sa kaso sa dengue gikan sa buwan sa Enero hangtud Agosto niining tuiga nga nitala og 2,278 ka kaso ug 10 ang patay itandi sa 11,680 ka kaso ug 40 ang patay sa susamang buwan sa nakalabay nga tuig.

Si Cimafranca nipasabot nga ila na’ng gipaabot nga mokunhod ang kaso sa dengue ning tuiga tungod kay taas man ang kaso niini sa niaging tuig.

Apan bisan pa man niini, si Cimafranca nitug-an nga ang ilang buhatan wala mokompiyansa ug nipadayon sa ilang kampanya batok sa dengue. (BANAT NEWS)