CITOM mokuha og dugang 70 ka enforcers

CEBU, Philippines - Ang kadagkoan sa Cebu City Traffic Operations Management (CITOM) gusto nga dugangan og 70 ang ilang mga traffic enforcers aron nga mas epektibo nilang mapahapsay ang dagan sa mga sakyanan sa dakbayan.

Si Konsehal Gerardo Carillo misugyot og resolusyon nga nag-awhag sa City Budget Office nga gahinan og P3.6 milyones ang alang sa sweldo sa kuhaon nga bag-ong traffic enforcers bali’g unom ka buwan.

Ang CITOM aduna lay kapin sa 250 ka traffic enforcers ug gihulagway nga kuwang ra kaayo kini kon ibutang sa tanang dagko nga eskina sa dakbayan. Matag traffic enforcer sweldohan og P400 matag adlaw.

Si Jonathan Tumulak, operations chief sa CITOM, mipasabot nga pagkakaron adunay mga eskina nga gibuak ang duty sa mga enforcers aron mo-report lang sila sa panahon nga problema kaayo ang trapiko.

Apan matud ni Tumulak nga niini’ng milabay nga mga adlaw nabantayan nila nga dili na g’yud katalikdan ang mga eskina tungod kay nagkadaghan g’yud ang mga sakyanan.

Base sa rekord sa Land Transportation Office (LTO) aduna nay 652 mil kapin ka sakyanan nga narehistro dinhi lang sa Central Visayas, ug kadaghanan niini ania sa Sugbo.  Ang mga sakop sa Cebu City Council miawhag usab ni Konsehal Carillo nga ioktaba ang pagtuki sa mao nga isyu unya sa sunod nga sesyon. (BANAT NEWS)