CEBU, Philippines – Nipiyait ang mga tindera sa Tabunok Public Market sa dobleng bayranan sa abangan nga gipahamtang ngadto kanila diin lakip sa gipabayaran ang stalls sa Lagtang Public Market.
Atol sa sesyon sa konseho sa dakbayan sa Talisay, gipadayag sa pangulo sa kahugpungan sa mga manindahay nga si Sherwin Echavez ang ilang hangyo nga undangon na ang pagpabayad sa dobleng abangan.
Matud ni Echavez nga bisan wala na gamita ang mga stalls sa Lagtang paninglan gihapon sila og abang sa gigamit nila nga stalls sa dihang didto sila gibutang human gisirado ang merkado sa Tabunok.
Alang kaniya, bug-at na kaayo alang sa mga tindera ang dobleng abangan.
Gipasalig ni Konsehal Danny Caballero nga imbestigahon nila ang reklamo ni Echavez mahitungod sa dobleng bayranan ug ipaabot nila kang Mayor Johnny V. de los Reyes ang maong hangyo.
Si Caballero niduso na og resolusyon nga naghangyo ni delos Reyes sa pagpahunong sa pagpaningil sa abangan sa Lagtang.
Ang kahugpungan sa mga tindera sa Tabunok Public Market aduna’y kapin sa 500 ka sakop gikan sa siyam ka seksyon sa merkado. - /GMR) (BANAT NEWS)