Laing landslide miigo sa manipis

CEBU, Philippines – Laing landslide na usab ang nahitabo sa Sitio Campo-4, Barangay Manipis, siyudad sa Talisay hinungdan nga wa paagii ang karsada  tungod sa daghang bato ug yuta ang mibabag sa karsada. Ang pangulo sa Local Disaster Risk Reduction and Management Council sa siyudad Vince Monterde miasoy nga nahitabo ang landslide pasado alas-6 sa buntag kagahapon.

Matud ni Monterde nga si Barangay Kapitan Emma Cabiluna nangayo og tabang sa kabalaka nga daghang di maka-avail sa bakuna sa tipdas ug polio kagahapon kay di man maagian ang dalan.

Hinuon wala’y panimalay nga naigo ug wala usab gikatahong naangol o nakalas. Si Konsehal Danny Caballero mirekomendar nga mas maayong mabalhin na ang mga nagpuyo sa dapit aron dili mameligro ang ilang kinabuhi.

Kahinumdoman nga niadtong miaging semana nahitabo usab ang usa ka landslide sa mao gihapong dapit diin usa ka panimay ang naigo sa dakong bato. - /EIM) (BANAT NEWS)