Pagpabakwit sa taga Manipis gihingusgan

CEBU, Philippines - Giduso sa City Disaster Risk Reduction and Management Office ngadto sa konseho sa dakbayan sa Talisay ang rekomendasyon sa pagpabalhin sa mga nagpuyo daplin sa karsada sa Manipis.

Kini aron mapalig-on ang ilang rekomendasyon pinaagi sa himuong lakang sa konseho.

Matud ni Vince Monterde, pangulo sa CDRRMO, nga ilang nasuta nga kinahanglan na gyud ibalhin ang mga residente tungod sa kakuyaw sa landslide.

Iya usab gidugang nga nagplano ang Department of Public Works and Highways nga i-benching ang kilid sa bungtod aron mapugngan ang pagdahili sa bato ug yuta.

Ang kapitan sa Manipis nga si Enie Cabiluna gipapangita na og luwas nga relocation site nga pabakwitan sa mga residente.

Apan kadaghanan sa mga residente sa maong lugar nagdumili sa pagbalhin tungod kay matud nila naa didto ang ilang panginabuhian.

Apan hugot ang desisyon sa CDRRMO nga pabalhinon sila tungod sa ka risgo sa maong lugar. - /GMR) (BANAT NEWS)