Vital installations sa CV gihugtan ang seguridad
CEBU, Philippines - Gimando karon sa hepe sa Police Regional Office 7, Chief Superintendent Prudencio Tom Bañas nga pahugtan pa ang seguridad sa mga vital installations sa rehiyon, human nadiskubrehan ang usa ka car bomb sa Ninoy Aquino International Airport (NAIA) Terminal 3 Parking Area, kagahapon sa buntag.
Matud pa ni Bañas nga kinahanglang mohimo og mga “extra security measures” ang mga kumander sa mga lugar nga ilang gibantayan sama sa airport, pantalan, terminal, malls ug uban pa nga mga establisemento.
“If they can do that in Metro Manila ‘di rin malayo na tatargetin ang ating mga vital installation in Cebu City,” matud pa ni Bañas.
Gidugang ni Bañas nga ilang panigurohon nga maprotektahan ang Central Visayas batok sa unsa man nga hulga sa terorismo. Samtang ang hepe sa Police Center for Aviation Security (PCAS) Central Visayas chief Senior Superintendent Constantino Barot Jr., mitug-an nga ilaha na karong gipahugtan pa ang seguridad sa MCIA.
Ang tanang mga sakyanan nga mosulod sa tugpahanan apilon na sa ilang giinspeksyon.
Samtang ang hepe sa Regional Intelligence Division (RID) Superintendent Pablo Labra II mipadayag nga nagpadayon sila karon sa ilang monitoring.
Sumala pa sa report sa Agence France Presse, upat ka mga tawo ang naaresto kagahapon nga gidudahang maoy nagbilin sa usa ka van nga dunay daghang improvised explosive devices (IEDs) gikan sa NAIA Terminal 3. - /EIM) (BANAT NEWS)
- Latest
