Mga opisyal sa Labangon gipabayad sa korte

CEBU, Philippines- Gimandoan sa korte ang mga opisyal sa barangay Labangon, dakbayan sa Sugbo sa pagbayad og P10,000 nga attorney’s fees ug ubang gasto sa mga vendors nga nipasaka og kaso.

Gikiha og forcible entry sila si Kapitan Victor Buendia, Kagawad Ronald Dagatan, hepe sa tanod nga si Celerina Delos Reyes ug market administrator sa barangay nga si Lita Lomibao.

Ang mga vendors nga mireklamo mao sila si Pepito Pepito, Arceli Taboada, Rowell Torrenueva, Mary Torrenueva ug Teresita Oteda kinsa may kontrata sa ilang giabangang stalls gikan sa buwan sa Enero 2010 hangtud sa Disyembre 2013.

Matud sa mga reklamante nga niadtong Enero 7, 2014 gipadalhan sila og “final notice” ni Buendia sa pagbakante sa ilang mga stalls tungod kay ang ilang mga kontrata “null and void” na kini tungod kay nailisan na ang administrasyon sa barangay Labangon.

Ang mga vendors mipasangil nga uban sa 30 ka tanod ang mga opisyal sa barangay miimbargo sa ilang mga gamit ug miputol sa linya sa kuryente, tubig ug miguba sa mga stalls nga ilang giukopahan.

Ang mga opisyal sa ilang tubag nagkanayon nga wala hikawi sa ilang katungod ang maong mga vendors apan ang ilang mga kontrata na-terminated na kini.

Sa gikatakdang preliminary conference niadtong Mayo 9, ang mga vendors lang uban sa ilang abogado ang mitungha sa korte samtang wala’y giduso nga motion for reconsideration gikan sa habig sa mga opisyal dihang ang kaso gi-desisyonan.

Matud ni Judge Oscar Andrino sa Municipal Trial Court in Cities, Branch 5 nga bisan og expire na ang kontrata sa mga vendors apan automatic ang renewal basta lang wala’y mahimong kalapasan ang mga vendors. - /GMR) (BANAT NEWS)