CEBU, Philippines - Nagpetisyon ang Cambinocot Pump Irrigation System Association, Inc. (CAMPISAI) batok sa gipahigayong “well drilling” sa Metro Cebu JKS. Corp. alang sa “eel farm” sa ilang lugar.
Ang petisyon giduso ngadto sa mga opisyal sa barangay ug mga hingtungdang ahensiya sa gobiyerno. Gipadayag sa mga sakop sa CAMPISAI nga duna sila’y ‘traumatic” nga kasinatian kabahin sa pagkahubas sa mga tinubdan sa tubig sa ilang lugar tungod sa mga bomba sa tubig sa nagkalain-laing sitio nga gibutang sa Grogan Driller.
Matud sa mga miyembro sa CAMPISAI nga ang Metro Cebu JKS Corporation nga giingong gipanag-iya sa usa ka Korean nahimutang kini sa 200 metros gikan sa drilling site sa NIA pump irrigation project ug nahadlok silang ang ilang irrigation system maapektohan.
Ang CAMPISAI recipient kini sa irrigation project sa National Irrigation Administration (NIA) diin 300 ka miyembro ug konsumedor alang sa agrikultura ug domestic nga kagamitan ang nagsalig sa maong proyekto. Niadtong Hunyo 16, ang National Water Resources Board (NWRB) miluwat og “cease and desist order” ngado sa Metro Cebu JKS Corporation. Matud sa maong order nga ang kompaniya nakalapas sa Article 64 sa Water Drilling Code of the Philippines tungod kay wala kini’y Permit to Drill (PTD). Sa gipahigayong sesyon niadtong Miyerkules, ang konseho sa dakbayan sa Sugbo miduso sa maong isyu ngadto sa Office of the Building Official (OBO), Cebu City Environment and Natural Resources Office (CCENRO), NWRB ug utilities. (BANAT NEWS)