DepEd papananghiron sa DENR
CEBU, Philippines - Gikinahanglan ang pagtugot sa Department of Environment and Natural Resources kon aduna’y mga punoan sa kahoy nga putlon sulod sa compound sa mga publiko o pribadong mga tunghaan.
Ang tigpamaba sa DENR-7, Eddie Llamedo, mipadayag niini isip reaksiyon sa tinguha sa Department of Education (DepEd) sa pagputol sa mga kahoy nga nakahatag og hulga sa kasegurohan sa mga tinun-an.
Matud ni Llamedo nga sa higayun nga moputol og mga kahoy sulod sa mga tunghaan mao’y himoon ang pagpangayo og permiso sa ilang buhatan.
Gitataw niya nga niadto makahimo sa pagmando sa pagputol sa mga kahoy sulod sa mga tunghaan ang mga school superintendent apan aduna’y pag-amendar niini niadtong tuig 2011.
Ubos sa bag-ong balaud, ang school principal nga makahimo sa kalapasan kinahanglan nga mopasabot kini ngadto sa ilang buhatan.
Nasayran nga gipadayag ni DepEd-7 Regional Director Carmelita Dulangon ang iyang tinguha nga pagputol sa mga kahoy sulod sa mga publikong tunghaan nga kuyaw na nga matumba ug makahatag og kadaut sa mga bata nga nagtungha. (BANAT NEWS)
- Latest
