CEBU, Philippines - Usa ka 17-anyos nga lalaki’ng wala’y trabaho ang gidunggab-patay sa tigbantay og parking lot sa fast food store kagahapon sa kadlawon didto sa Manuel Quezon Highway, dakbayan sa Lapu-Lapu.
Ang biktima mao si Juan Patalinghug, molupyo sa Sitio Kitchen, Barangay Pajo samtang ang suspetsado nga midunggab kaniya mao si Joey Cadel, 39, taga Sitio Kamansi sa mao gihapon nga barangay.
Matud ni PO1 Benhur Cuadra sa Lapu-Lapu City Police Office nga nahitabo ang panaglalis ala-1:45 sa kaadlawon tungod lang sa helmet sa motor kay gikatahapan ni Cadel nga kawatan si Patalinghug.
Taliwala sa ilang panaglalis, wala makapugong si Cadel ug nihulbot og kutsilyo dayong dunggab sa biktima ug gibiyaan kini nga nagkadugo. Si Patalinghug gidala sa Lapu-Lapu District Hospital ug dali nga gibalhin sa Vicente Sotto Memorial Medical Center apan namatay gihapon ang biktima.
Si Cadel mitahan sa kapolisan kagahapon sa buntag ug mitug-an nga nahadlok siya nga panimaslan unya sa kabanayan sa iyang napatay kay nakadungog siya og tabi-tabi nga kon siya makit-an ilang ihawon. (BANAT NEWS)