Gitulis sulod sa lodge
CEBU, Philippines - Gidakop sa kapolisan ang usa ka babaye nga giingong apil nga misulod sa usa ka lawak sa YSL Lodge sa dalan Manalili ug nanguha’g kuwarta nga kapin sa P11 mil kagahapon.
Ang gitanggong sa Waterfront Police Station mao si Rochelle Ramirez, 35, taga Valladolid, Carcar. Gitumbok si Ramirez nga usa sa mibiktima ni Bernardo Marcojos, 29, taga Loon Bohol.
Sa imbestigasyon sa mga sakop sa Waterfront Police Station nasayran nga samtang natulog ang biktima sa maong pension house, kalit lang kini nga gisulod sa maong babaye kauban ang iyang ka live-in partner ug gitulis.
Wala na’y nahimo ang biktima gawas sa paghatag sa iyang kuwarta sa kahadlok nga siya patyon.
Sa follow-up operation sa kapolisan, ilang nasakpan ang babaye didto sulod sa usa ka pension house sa dalan Sanciangko ug positibo kini nga gi-ila ni Marcojos nga maoy misulod sa iyang lawak.
Si Senior Inspector Wayne Magbanua, hepe sa Waterfront Police Station, mitug-an nga ila ra ‘sab nga gibuhian si Ramirez kay dili interesado ang biktima nga mopasaka og kaso human mauli ang kuwarta. (BANAT NEWS)
- Latest
