CEBU, Philippines - Gilauman nga masugdan karong Nobiyembre ang pagtukod pagbalik sa merkado sa dakbayan sa Mandaue sa karaang nahimutangan niini luyo sa National Shrine sa Saint Joseph sa barangay Centro.
Si Mosuline Suliva, market administrator, miingon nga naglakip sa gihimong pag-andam ang pagproseso sa mga gikinahanglan nga mga dokumento alang sa pagpagawas sa gahing salapi.
Kasamtangan usab nga gipangitaan og kabalhinan ang buhatan sa Presinto 1 sa Mandaue City Police Office (MCPO) sa dili pa sugdan ang pag-guba sa nahabiling istruktura sa nasunog nga karaang merkado nga gigamit sa kapolisan.
Kahinumduman nga gibalhin ang mga naninda sa karaang merkado dihang nahuman ang pagtukod sa bag-ong merkado sa luyong bahin sa Mandaue City Sports and Cultural Complex.
Gibiyaan sa 400 kapin ka mga manindahaay ang bag-ong merkado human gitay-og sa 7.2 magnitude nga linog niadtong Oktubre. Ang mga structural engineers nga mihimo sa pakisusi mismo ang misugyot sa pagpa-abandonar sa merkado.
Temporaryong gipahimutang sa gitukod nga mga payag-payag sa palibot sa lugar gawas nga bahin sa bag-ong merkado ang mga manindahay sa pagkakaron aron makapadayun sa pagpaninda. (BANAT NEWS)