Nadakpan sa checkpoint suspek sa tulis sa Balamban

CEBU, Philippines - Positibong gitudlo sa cashier sa gas station sa lungsod sa Balamban ang usa ka lalaki nga nasikop sa checkpoint sa Mabolo Police Station nga maoy usa sa upat nga mitulis kanila niadtong nakalabay nga adlaw. Matud sa hepe sa Mabolo Police Station, Senior Insp. Hartzel Bellido, wala’y duha-duhang gitudlo ni Dinesber Borja, cashier sa FB gas station sa Balamban, ang suspek nga si Virgilio Navales, 25 nga taga Singsing sa maong lungsod.

Si Navales nisuway unta og likay sa gipahigayung checkpoint sa Lahug, dakbayan sa Sugbo niadtong Martes apan siya nadakpan ug nakuhaan og .38 revolver ug tulo ka paketeng shabu.

Sumala ni Bellido nga dali nga nailhan ni Borja si Navales gumikan kay wala nagtaptap sa iyang nawong atol sa pagpanulis ug usa sa duha ka suspek nga misulod sa cashier’s room ug mikuha sa P20 mil nga kinitaan sa maong gas station.

Plano sa Mabolo Police nga makig-alayon sa Balamban Police Station alang sa dugang pa’ng imbestigasyon. (BANAT NEWS)