CEBU, Philippines - Nasikop sa Regional Anti Illegal Drugs Special Operations Task Group 7 sa buy-bust operation ang usa ka labandera nga giingong level 2 drug pusher pasado alas 12:00 kagahapon sa udto sa P. del Rosario Extension, Sambag I sa dakbayan sa Sugbo.
Ang babaye naila sa mga ngalan nga “Mary Jane De Guzman” ug “Marilou Toledo”, 50, usa ka single mother ug may lima ka anak. Si Senior Inspector Mark Henrix Bancoleta nga nahinabi sa Banat News miingon nga ang pagsikop kaniya pinasikad sa search warrant nga giluwatan ni Judge Wilfredo Navarro sa TRC Branch 19 .
Nakuha sa kapolisan ang usa ka dakong pakete, duha ka medium size nga pakete, lima ka gamay nga pakete nga may sulod nga gituohang shabu nga mobalor og P472 mil. Nakuha ‘sab ang drug paraphernalia ug digital weighing scale ug ang P500 nga marked money.
Ang suspek nga nagpailang Marilou Toledo nga nahinabi sa Banat News miingon nga napugos siya niini nga trabaho tungod sa kawad-on kay may lima siya ka anak nga gibuhi. (BANAT NEWS)