Bag-ong plate numbers sa motor hapit na
CEBU, Philippines- Gipahibawo ni DOTC Assistant Secretary Alfonso Tan nga sa hinapos sa Agosto mangabot na ang 26 mil ka bag-ong plaka alang sa mga bag-ong motorsiklo. Gipakita nila ang bag-ong disinyo nga kolor puti ug itom nga plate numbers sa mga motorsiklo dungan sa pasalig nga tamper-proof ug dili dali nga makopya sa mga kawatan ang bag-ong disinyo.
Si LTO-7 Regional Director Arnel Tancinco miingon nga magsugod na sila pagpanghatag sa mga bag-ong plate numbers sunod buwan kini naglakip na sa mga motorsiklo ug sa mga 4-wheel vehicles.
Matud ni Secretary Tan nga sugdan na usab nila ang pagpatuman sa “no plate, no travel policy” kon makaisyu na ang LTO og bag-ong mga plate numbers sa mga motor ug ubang sakyanan.
Pagka karon puwerte’ng daghana sa mga sakyanan nga nagdagan-dagan nga walay plate numbers. Ang rason niini mao nga nahutdan ang LTO sa gikinahanglan nga plate numbers.
Nasayran nga ang mangabot nga mga bag-ong plaka adto ipanghatag sa mga car dealers nga namaligya og mga motorsiklo ug mga 4-wheel vehicles nga mga sakyanan nga taud-taod na nga nagpaabot sa maong mga plaka. (BANAT NEWS)
- Latest
