Mayor nalutsan og warrant
CEBU, Philippines- Nalutsan og warrant of arrest si Madridejos Mayor Salvador Dela Fuente sa upat ka kasong kriminal sa kalapasan sa Omnibus Election Code may kalambigitan sa May 10, 2010 nga eleksiyon.
Si Atty. Maria Norina S. Tangaro-Casingal sa Law Department sa Commission on Elections sa Manila ang misang-at sa kaso niadtong Huwebes sa Regional Trial Court Branch 61 sa dakbayan sa Bogo.
Si RTC Judge Antonio Marigomen niluwat niadtong Lunes sa warrant of arrest batok ni Dela Fuente ug ubang akusado nga sila si Ramon “Ging-Ging” Dela Fuente, igsoon sa mayor (tulo ka kaso); Manuel Sarraga (upat); ug usa ka kaso batok ni barangay kapitan Jerry Caranzo.
Si RTC Clerk of Court, Atty. Rey Caayon, nibutyag nga nakapiyansa na ang mga akusado sa samang adlaw nga giluwatan ang warrant of arrest sa kantidad nga P12,000 matag kaso.
The Comelec En Banc niadtong Disyembre 21, 2012 nakahukom nga pasakaan og kasong criminal ang mga akusado nunot sa giingong mga pagpanghulga, pagpanghadlok, terorismo ug uban pang dautang buhat panahon sa eleksiyon. Usa niini ang giingong pagpusil lima ka higayun sa panimaye ni Leonardo Butaya niadtong gabii sa Mayo 13, 2010.
Si Butaya supporter ni bise mayor Doroteo Salazar kinsa nidagan pagka-mayor niadtong higayuna batok ni Mayor Dela Fuente.
Si Mayor Dela Fuente sa sayo pa miduso og mosyon nga mabasura ang kaso sanglit wala siya gitumbok sa reklamo nga usa sa nihimo sa krimin. (BANAT NEWS)
- Latest
