CEBU, Philippines- Gibutyag ni Cebu Archbishop Jose Palma nga dili pa karon ang tukmang panahon aron ipahigayon ang Charter Change kun pag-usab sa constitution aron malugwayan ang termino ni Presidente Benigno Aquino III.
Matud ni Palma nga daghan karon nga giatubang nga isyu ang Pilipinas nga maoy angayan unang sulbaron sa administrasyon ni Aquino ug di pa haom nga hisgutan ang Cha-cha.
Gipasabot sa Arsobispo nga di dali ang pag-usab sa Konstitusyon ug gikinahanglan pa kini og makuti nga pagtuon ug di kini mahimo sud lang sa usa ka tuig.
Gitataw ni Palma nga angayang sulbaron sa Malacañang ang isyu sa Pork Barrel Fund, ang maong pundo naputos sa kontrobersiya gumikan kay nahimo kining tinubdan sa kurapsiyon sa mga magbabalaod.
Nasayran nga di pa lang dugay mipagawas ang Arsobispo og pastoral letter nga gipadala ngadto sa tanang parokya sa Archdiocese sa Sugbo kini aron suportahan ang people’s initiative batok pork barrel.
Usa sa ilang gipanawagan sa pagbotar sa katawhan sa usa ka balaudnon nga maoy mahimong sumbanan sa gobiyerno sa pagpagawas og pundo nga gikinahanglan.
Midugang si Palma nga bisan og tres porsiyento lang sa mga botante matag distrito ang mobotar alang sa maong balaudnon dako na kaayo kini og ikatabang aron hingpit ang kausaban sa pagpagawas sa pundo alang sa kalambuan sa kadaghanan. - /EIM) (BANAT NEWS)