Kabalayan sa kamagayan gidemolis
CEBU, Philippines- Daghang mga balay sa Sitio City Center, Barangay Kamagayan dakbayan sa Sugbo ang gidemolis aron tukuran og condominium ang maong lugar.
Si Remando Madrinan, team leader sa inspection team sa Prevention, Restoration, Order, Beautification and Enhancement kun PROBE nagkanayon nga 80 ka balay ang ilang gidemolis base sa kamandoan nga ilang nadawat.
Sumala pa niya nga duna usab ipatuman nga re-blocking sa maong dapit ug bahinon og tarong ang mga luna aron kapuy-an sa mga residente.
Si Madrinan miingon nga sa pagkakaron wala pa sila kahibalo kung pila gyud ang gidak-on sa lugar tungod kay wa pa hingpit nga mahuman ang clearing nga ilang gihimo. Molanat og usa ka semana ang tagal sa pag-demolish sa maong lugar.
Matud ni Raquel Avila, barangay kapitan sa Kamagayan nga planong tukuran og duha ka condominium ang maong lugar.
Ang usa puy-an sa mga empleyado sa City Hall ug ang usa puy-an sa ubang mga residente sa Kamagayan nga naigo sa demolisyon.
Sa pagkakaron, aduna’y napulo ka tents nga gitukod atubangan sa barangay hall ug sa basketbolan aron maoy temporaryong puy-an hangtod nga wa pa nahuman ang clearing sa lugar.
Si Mary Flor Juanico usa sa mga residente nga naigo sa demolisyon miingon nga uyon sila sa gihimo tungod kay human sa re-blocking pareho na ang gidak-on sa ilang lugar. Gipasalig ni Avila nga makabalik ra gihapon ang mga residente sa ilang mga lugar. - /EIM) (BANAT NEWS)
- Latest
