CEBU, Philippines- Patay ang usa ka lalaki kinsa unang namusil sa iyang gikalalis sa tigbakayan sa lungsod sa Tabogon niadtong Sabado sa gabii.
Ang biktima nailhan nga si Valeriano Ytang, 64, nga taga barangay Managase sa maong lungsod.
Matud ni PO3 Gregorio Licayan, imbestigador sa Tabogon Police Station, nga gikan sa barangay Ilihan ang biktima diin mitambong sa tigbakayan nunot sa kasaulogan sa piyesta.
Sumala pa ni Licayan nga atol sa tigbakay nakakita og away si Ytang batok sa usa ka Federico Arpon nga nagpuyo sa barangay Ilihan sa wala matino nga hinungdan.
Sa pag-uli ni Ytang agi sa panimalay ni Arpon, subli nga nagkatinubagay ang duha ug mibahad si Ytang nga mobalik.
Nibalik si Ytang nga nagdala og 357 revolver ug gipusil si Arpon kinsa nakaangkon og igo sa tiyan ug paa apan nakahigyun pa kini og dagan.
Gisuwayan pa unta paggukod ni Ytang si Arpon apan usa ka wala mailhing tawo ang nipusil sa biktima.
Igo sa dughan, bukton, tiyan ug ubang parte sa lawas ang naangkon ni Ytang kinsa gidali pa unta pagdala sa tambalanan apan nakabsan gyud sa iyang kinabuhi.
Nakuha sa kapolisan sa crime scene ang walo ka kabhang sa 9mm pistol ug duha ka deformed slug.
Matud pa ni Licayan nga duna na sila’y lead sa pangan sa suspek kinsa ila pa nga gipangita.
Samtang sa dakbayan sa Sugbo, patay usab ang usa ka lalaki human pusila sa may Villagonzalo II, Tejero dihang nagduwa kini og hantak alas 5:55 gahapon sa buntag.
Ang biktima naila lang nga usa ka “Mapa” ug gibana-banang 30-anyos ug construction worker sa usa ka mall ug lumad nga taga lungsod sa Dumanjug.
Ang suspetsado naila lang usab sa pangan nga Ostong Dela Cruz, taga Villagonzalo II, Tejero.
Sa imbestigasyon sa kapolisan nasayran nga samtang moantog na unta ang biktima kalit lang kini nga giduol sa suspek kinsa namusil sa makadaghang higayun.
Nakuha sa kapolisan sa crime scene ang unom ka basiyo sa bala sa 9mm pistol ug tulo ka deformed slug. - /GMR) (BANAT NEWS)