Palma: Apil mobatok pork

CEBU, Philippines- Giawhag ni Arsobispo Jose Palma ang publiko pinaagi sa usa ka pastoral letter nga moapil sa “People’s Congress” aron hingpit nga mawagtang ang pork barrel system.

Ang maong kalihukan ipahigayun sa Cebu Mariners’ Court karong Agosto 23 alas otso sa buntag hangtod alas tres sa hapon.

Ipresentar sa katawhan sa Plaza Independencia ang draft sa balaudnon nga magwagtang sa sistema sa pork barrel ug didto himoon ang signature campaign alang sa People’s Initiative.

Tumong sa kalihukan nga magamit ang konstitusyonal nga gahum sa katawhan aron mohimo og balaud nga gikan sa kabubut-on sa katawhan.

Subay sa batakang balaud nga kinahanglang makakuha og 12 porsiyento nga pirma sa mga tawo lukop nasud aron mahimong balaud ang lakang nga pasiugdahan pinaagi sa People’s Initiative.

Kahinumduman nga gideklarar na nga unconstitutional ang Priority Development Assistance Fund (PDAF) ug ang Disbursement Acceleration Program (DAP) apan giingong gisukip gihapon sa proposed 2015 General Appropriations Act.

Matud ni Palma nga ang sistema sa pork barrel maoy makaingon sa korupsyon ug pamolitika.

Tinguha niya nga ang tibuok Artsidyosesis sa Sugbo makighiusa sa pagsuporta sa maong adbokasiya.

Gidapit ni Palma ang mga Episcopal Vicars, clergy representatives gikan sa lain-laing distrito, lay representatives ug tanang parokyano sa Sugbo aron mosalmot sa maong kalihukan. - /GMR) (BANAT NEWS)