Milayat gikan 12th floor
CEBU, Philippines - Usa ka lalaki nga gikatahong may suliran sa gugma miambak sa usa ka building sa IT Park sa Barangay Lahug kagahapon sa kaadlawon.
Ang maong lalaki naila nga si Ernie Cadjong Antigua Jr., technical support, empleyado sa Convergys, molupyo sa barangay Looc sa dakbayan sa Mandaue.
Base sa imbistigasyon sa Homicide Section sa Cebu City Police Office nga nadawat nila ang alarma sa alas 12:12 sa tungang gabii. Naabtan na lang sa grupo ni SPO1 Rey Cuyos nga nagkadugo na ang maong lalaki ug naka-angkon kini og grabeng kadaot sa iyang ulo ug lawas.
Sumala pa nga kalit lang nahagsa sa mga call center agents nga nangaon ug nangape sa mga shop sa ground floor sa maong building si Antigua.
Nasuta nga gikan siya sa roof deck sa dose ka andanang edipisyo ug natugpa sa atop sa entrance apan milusot kini sa ubos. Nakuhaan og footage sa Closed Circuit Television Camera si Antigua sa ika-12 nga andana nga misaka sa roof deck ug milayat sa ubos.
Pipila ka minuto sa wala pa ang hitabo nag-post kini sa iyang Facebook page nga nanamilit sa iyang pamilya ug sa iyang mga higala ug nangayo og pasaylo sa iyang buhaton tungod sa nahitabo sa relasyon nila sa iyang uyab.
Base sa imbistigasyon sa kapolisan nga ang igsuon sa namatay mihatag kanila og unom ka pahina nga suicide note nga gipahinungod niini sa iyang ginikanan, igsuon, higala ug sa iyang kanhi uyab.
Matud pa ni Dacua nga base sa sinulat sa maong lalaki masabot niya nga duna kini personal nga problema lakip na sa gugma. (BANAT NEWS)
- Latest
