Kanhi BIN nasakmitan og mga armas, drugas
CEBU, Philippines - Nasakmit sa kapolisan ang mga armas ug shabu gikan sa kanhi sakop sa Barangay Intelligence Network (BIN) nga gipadakop sa iyang kapuyo sa Cabancalan, Jubay, Liloan niadtong Huwebes sa gabii.
Ang gidakop sa kapolisan mao si Luel Cimafranca Dinopol, 27-anyos nga nagpuyo sa maong dapit nga naaktohan nga naghupot sa rifle type nga kalibre .22 nga armas uban ang 40 ka mga bala.
Ang hepe sa Lilo-an Police Station, Senior Insp. Ramil Morpos, ang nangulo sa pagdakop sa suspetsado ug dugang armas nga kalibre .45 uban ang 17 ka bala sa magazine ang ilang nakuha gikan sa belt bag nga gibakus niini.
Matud ni SPO1 Bryan Batiquen nga nag-away ang suspetsado ug ang kapuyo nga si Eden Retchelle Puntono ug sa mao nilang panag-away nagpaso-paso kini sa ilang dapit nga nagbitbit og armas.
Sa inisyal nga imbestigasyon sa kapulisan dili lisensyado ang mga armas ni Dinopol ug matud pa sa suspetsado nga pang self-defense lang kini. Sa pagkakaron gibilanggo na sa Liloan Police Station si Dinopol ug anaa na sa PNP Crime Laboratory-7 ang mga armas ug shabu alang sa ipahigayon nga laboratory examination.
Kasong kalapasan sa ilegal nga paghupot og armas ug ilegal nga drugas ang giandam batok sa dinakpan. (Romeo T. Limpangog ug USJR MassCom Intern Thea Deseree A. Ceniza/GMR) (BANAT NEWS)
- Latest
