CEBU, Philippines - Nailhan na sa kapolisan ang lider sa mitulis sa LBC Remittance Center sa dalan Escario, dakbayan sa Sugbo.
Giila sa kapolisan ang usa ka Leonardo Rama, kanhi military agent sa Davao Region.
Ang direktor sa Cebu City Police Office (CCPO), Sr. Supt. Noli Romana, nagkanayon nga halos tulo na ka tuig si Rama sa Sugbo ug nagbalhin-balhin og katagoan.
Gikonsiderar sa kapolisan nga armado ug delikado ang grupo.
Nadakpan na ang maong suspek niadtong Mayo 11, 2012 sa Labangon sa kasong paglapas sa RA 8294 apan nakabutang kini og piyansa.
Gitudlo usab ang grupo ni Rama nga maoy mitulis sa usa ka pharmacy sa Pardo sa niaging tuig ug nag-atubang usab kini og kasong carnapping.
Ang grupo napalpak sa pagpanulis sa usa ka mall sa niaging tuig ug nasakmit sa kapolisan sa parking area ang daghanang armas nga gibiyaan.
Duda si Romana nga wala na’y kwarta ang grupo ni Rama hinungdan nga gitulis ang remittance center nga wala’y guwardiya.
Gibutyag ni Romana nga nagkaproblema si Rama sa ilang trabaho isip military agent sa Davao hinungdan nga gibuhi-an kini sa iyang yunit ug nagtukod hinoon og usa ka robbery group.
Sumala pa ni Romana nga konektado si Rama sa ubang dagku nga grupo sa mga tulisan sama sa Ozamiz Robbery Group ug nagsilbing tigpahibawo kung asa ang ilang sunod nga target.
Gitinguha ni Romana nga mabutang isip “most wanted person” sa Sugbo ang suspetsado ug nanawagan sa katawhan nga mo-report sa ilang buhatan kung kini ilang makita aron masikop. (/GMR)(BANAT NEWS)