Babayeng pusher nakasibat atol sa ronda
CEBU, Philippines- Wala’y nasikop ang kapolisan atol sa gihimong ronda sa usa ka panimaye sa gidudahang drug pusher sa Dunggoan, Basak, dakbayan sa Mandaue niadtong Domingo sa gabii.
Hinuon aduna’y mga nasakmit nga duha ka gagmay’ng pakete sa shabu ug drug paraphernalia sa panimaye sa usa ka Josephine Manatad.
Si Senior Insp. Genilo Veraque ang nangulo sa pagpangronda pinasikad sa search warrant nga giluwatan ni Judge Teresita Galanida sa Branch 56 sa Regional Trial Court (RTC) sa dakbayan sa Mandaue.
Nagtuo ang kapolisan nga nakamatikod ang suspetsado sa ilang paghiabot sa lugar maong dali nga nakasibat.
Samtang nasikop ang usa ka Simplicio "Pisyot" Berame, 53-anyos sa usa ka buy-bust operation sa Zone Lato, Kalawisan, dakbayan sa Lapu-Lapu niadtong Domingo sa hapon.
Nasakmit gikan kang Berame ang 10 ka gagmay’ng pakete sa shabu ug usa ka medium size nga pakete.
Matud ni Senior Insp. Wilbert Parilla na-pusasan si Berame human nitunol og drugas sa poseur police buyer.
Gawas sa nasakmit, usa ka ginamit nga nalanay nga shabu ang nakuha kauban sa P200 nga marked money. - /GMR) (BANAT NEWS)
- Latest
