Nabutha’g dinamita

CEBU, Philippines- Patay ang usa ka mananagat human nabuthan sa gigamit nga dinamita atol sa ilang pagpanagat didto sa Barangay Gibitngil, Medellin sa miaging hapon.

Ang biktima naila nga si Ignacio Monato, 46, nagpuyo sa Purok Tomas, Kawit, Medillen kansang lawas maayong pagkapusgay sa pagbuto sa dinamita.

Matud pa ni PO2 Roselito Ortega sa Medillen Police Station nga kuyog ni Ignacio atol sa pagkahitabo ang iyang anak nga maoy nagsilbi nga tigbugsay sa ilang sakayan.

Sumala pa nga sa dihang nakakita og sarop sa isda dali kini nga mikuha og dinamita ug gidagkotan apan wa pa niya kini malabay mibuto kini hinungdan sa grabeng kadaot sa iyang dughan ug ubang parti sa iyang lawas  ug nawala ang iyang tuo nga bukton.

Ang mga kauban niini nga mananagat nga nakabantay sa maong panghitabo ang dali nga mitabang sa manag-amahan apan nakabsan g’yud sa iyang kinabuhi si Ignacio. Sumala pa ni PO2 Ortega nga gumikan sa kakusog sa pag-ulbo   naguba ang ilang sakayan, swerte hinuon nga wala maapil ang iyang anak.

Si Ortega miingon nga dugay na silang nagsige og pahimangno sa mga mananagat nga hunongon na ang ilegal nga pamaagi sa pagpanagat, apan giangkon niya nga kadaghanan kanila gusto lang gyud og dali nga paagi aron makakuha og daghang isda bisan sa sayop nga paagi. - /EIM) (BANAT NEWS)