Saktong paghipos sa iti gimando

CEBU, Philippines- Nagtagbo na ang  Department of Environment and Natural Resources (DENR-7) ug ang  kadagkuan sa  gireklamo nga  Cebu TH Poultry House Corporation nga giingong maoy  hinungdan sa pagdagsa sa langaw sa lungsod sa Asturias.

Nasayran nga ang Cebu TH Poultry House Corporation nakalapas sa lima ka conditions sa Environmental Compliance Certificate sama sa pagkontrolar sa mga langaw ug saktong waste disposal.

Ang maong kalapasan nakamugna og problema sa pipila ka barangay tungod kay midagsa ang daghang langaw nga hinungdan  sa pagkasakit sa pipila ka mga residente sa lugar.

Tungod niini ang DENR-7 mimando sa poultry house sa pagduso og mga corrective measures aron masolusyunan ang problema sa pagdagsa sa daghang langaw sa lungsod sa Asturias.

Si Dr. Eddie Llamedo sa iyang bahin miingon nga karong Agosto 27 nasabutan sa isig ka habig nga mohimo og joint inspection sa poultry house aron pagsusi kun epektibo ba ang mga corrective measures  nga gipatuman.

Padayon pa nga maka-operate ang poultry  apan pasiraduhan kini kun di nila sundon ang pamaaging gitudlo kanila.

Sa pagkakaron duna pa gihapoy mga langaw apan di na susama ka daghan sa miaging buwan.

Si Ebert Casanes, tag-iya og karenderya nga nahinabi sa Banat News miingon nga bisan pa man dunay mga langaw daghan man lang gihapon ang mangaon sa iyang tindahan sa barangay Poblacion.

Hinuon gisiguro niyang limpyo iyang kan-anan pinaagi sa pagbutang og chlorine ug fabric softener sa iyang pwesto aron dili kaayo makaduol ang langaw. Si Jhona Mharee Bantilan, estudyante nga naatlan sa Banat News nga nagkaon sa karenderya ni Casanes miangkon nga nabalaka siya apan mokaon lang gihapon siya tungod kay gutom na man.Ang Asturias magsaulog sa ilang kapistahan karong Sabado ug lakip na unya sa mamista mao ang mga langaw.  - /EIM) (BANAT NEWS)