CEBU, Philippines - Nadakpan sa nagpatrolyang kapolisan sa dakbayan sa Mandaue ang suspetsado sa pagtulis sa duha ka tawo sa plaza sa Centro, dakbayan sa Mandaue niadtong Sabado sa gabii.
Si PO2 Jesson Flores sa Presinto 1 sa Mandaue City Police Office (MCPO) miila sa nadakpan nga si Cedric Formentera, 18-anyos nga taga Banilad sa maong dakbayan.
Matud ni Flores nga ang dinakpan adunay mga kauban sa pagtulis sa duha ka biktima nga sila si Ronald Alinsug nga taga Zone Gabi, Paknaan sa maong dakbayan ug Renato Magnaye nga taga Pajac, dakbayan sa Lapu-Lapu.
Nag-iyaha’y og panagan ang mga kauban sa dinakpan dihang nakamatikod sa paghidangat sa mobile patrol nga giluwanan nilang PO1 Junjun Gomez ug PO1 Serwin Omelgo nga daling naka-kwelyo kang Formentera.
Ang duha ka biktima mipasangil nga gikuha ang ilang mga cellphones ug kuwarta sa mga kauban ni Formentera ug wala pa matagbaw gikalingawan pa sila og kulata nga nakaingon sa ilang pagkabun-og.
Si Formentera nga nagtingkagol sa detention cell sa kapolisan nagdumili pa gihapon sa pag-ila sa mga kauban nga nakadagan. (BANAT NEWS)