CEBU, Philippines - Gitinguha sa kagamhanan sa dakbayan sa Sugbo ang pag-regulate sa mga manindahay og PO cards sa dalan Colon.
Si Gerry Marquez, executive director sa Garbo Asenso Sumbanan Alyansa (GASA), miingon nga nakadani sa iyang pagtagad ang nagkatag nga PO vendors kilid sa Metro Colon tungod sa kasamok tan-awon niini.
Gipahibawo ni Marquez ang mga manindahay og PO cards sa maong dapit nga dili mag-atbang sa sidewalk aron daku ang hawan nga maagian sa mga tawo.
Usa sa mga palisiya nga ipatuman mao ang “one family, one stall” diin sa usa ka pamilya usa lang usab ang molingkod sa sidewalk.
Gidugang ni Marquez nga magpagawas usab sila og ID card sa mga vendors sa lugar aron mapatuman na nila ang “No ID, No Vending” sa lugar.
Gitin-aw ni Marquez nga kung may mohawa sa pwesto dili sila mahimong pulihan og lain. Tinguha sa GASA nga magkagamay ang gidaghanon sa mga vendors subay sa “No Growth Policy”.
Gihatag ni Marquez ang kaakuhan sa presidente sa kahugpongan sa mga sidewalk vendors nga pahibaw-on sila sa ilang kalihukan.
Daghang PO card vendors ang aktibong namaligya sa lugar apan giingong 57 lang kabuok ang moapil sa meeting ug mao ra ang apil sa listahan.
Gipasalig ni Marquez nga magbutang sila og mga tawo sa lugar aron maoy mobantay sa mga vendors kung kinsa kadtong molapas sa ilang nasabutan.
Si kinsa kadtong molapas sa palisiya mahimong makuhaan sa ilang ID ug dili na mahimong makatinda pagbalik. (/GMR)(BANAT NEWS)