CEBU, Philippines - Napun-an na usab ang listahan sa mga nasakpang adik nga kawani sa barangay human sa gipahigayon nga surprise drug test sa barangay Cogon Ramos ug Sapangdaku kagahapon.
Matud ni Dr. Alice Utlang pangulo sa Cebu City Office on Substance Abuse Prevention nga sa 61 ka kawani sa Barangay Cogon-Ramos 50 kanila ang gipaubos sa surprise drug test, duha kanila ang nagpositibo, usa ka tanod ug usa ka driver.
Samtang sa Sapangdaku, usa sa 59 ka mga kawani sa barangay nga nagpa-drug test ang nagpositibo, ang barangay adunay 70 ka kawani.
Sa kinatibuk-an 54 na sa 80 ka barangay sa dakbayan ang napaubos sa drug test ug 178 na ka buok ang nagpositibo.
Nalipay si Utlang nga nikunhod na ang gidaghanon sa mga nagpositibo sa mga drug tests nga buot pasabot duna nay kahadlok ang uban ug nangundang na sa paggamit og ginadili nga drugas.
“Unsaon man paglimpyo sa drugas sa mga barangay kung mismo ang mga tanod nga maoy motabang sa kapolisan mao man hinuo’y gauna sa listahan sa mga nagpositibo sa drug test?” si Utlang miingon.
Gihatag sa COSAP ang desisyon sa mga barangay kapitan kung ila bang tangtangon ang mga nagpositibo sa drug tests.
Sa pagkakaron padayon ang gihimong rehab sa mga nagpositibo sa drug test diin wa kaabot og 20 ang padayong nipaubos sa mga sessions sa COSAP. (/EIM)(BANAT NEWS)