Dakong sunog

CEBU, Philippines -  Mokabat sa kapin usa ka gatos ka mga panimalay ang gilamoy sa sunog ug gibanabanang mokabat sa 350 ka pamilya nga nagpuyo niini ang nawad-an og panimalay sa Sitio Palma, Barangay San Roque, Cebu City, kagahapon sa alas 4:05 sa hapon.

Sumala pa ni SFO2 Tristan Tadatada ang imbestigador sa Bureau of Fire Protection (BFP) ila karong gisubay ang report nga nagsugod ang sunog sa panimalay ni Nora Villarin. Dali nga midaku ang maong sunog tungod kay kadaghanan ginama sa light materials ang mga balay sa maong lugar.

Ang sunog miabot sa Task Force Alpha hinungdan nga miresponde usab ang ubang mga bombero sa mga silingang siyudad ug kalungsoran. Alas 4:48 na gideklara nga under control  ang kalayo ug gibanabanang P500 mil ang danyos samtang padayon pa nga gisubay ang hinungdan niini.

Si Kapitan Lidiore “Boy” Miranda nga nahinabi sa Banat News mitug-an nga didto una sa barangay gymnasium ipahiluna ang mga nasunogan nga pamilya. Gikatakdang ideklarar nga ubos sa state of calamity ang iyang barangay aron magamit ang ilang calamity fund aron matabangan ang mga biktima.

Matud pa ni Miranda nga ang  Sitio Palma, mao usa sa mga dapit sa iyang barangay ang dunay nagdasok nga mga tawo.

Samtang si Konsehal Dave Tumulak nga nahinabi sa Banat News nagkanayon nga kinahanglan magtigom ang mga opisyal sa Tinago ug San Roque tungod kay posibleng dunay mga nagpuyo sa maong lugar nga rehistrado sa Tinago.

Si Acting Mayor Edgardo Labella nga nahinabi ‘sab sa Banat News mipadayag nga sama sa polisiya ni Mayor Michael Rama, walay pamilya nga  ma-displace sa sunog.

Sunog sa Mandaue

Sa dakbayan sa Mandaue, naugdaw ang usa ka bodega sa construction materials, upat ka apartment ug usa ka machine shop sa dalan Mabini, Barangay Looc kagahapon sa udto.

Si SFO4 Teresito Mata, imbestigador sa Bureau of Fire Protection (BFP) sa maong dakbayan miingon nga ang nasunog mao ang BG Marketing nga gipanag-iya sa mga negosyante nga sila si Dionesio Ong ug Dennis Chua.

Matud pa ni Mata gipaubos sa Task Force Alpha  ang maong sunog hinungdan sa pagresponde sa tanang fire fighting units sa Metro Cebu.

Giingong nagsugod sa bodega ang kalayo ug mitapon sa Arcana Apartment, Antigua Apartment ug lain pang duha ka mga apartment ug machine shop nga gipanag-iya ni Ben Bardinas.

Milanat og 30- minutos una pa kini nakontrolar. Naglisod ang mga bombero tungod kay dunay mga kemikal ug mga plastik sa maong bodega. Wa pa matino ang hinungdan sa sunog ug kun pila ang danyos niini.

Napaig sa sunog

Samtang sa miaging gabii, patay ang usa ka 85-anyos nga biyudo human kini napaig sa nasunog nila nga balay diha sa barangay Candaguit sa Sibonga kagabii. Ang biktima giila nga si Wellington Lopez, kinsa giingong nag-inusara lang sa ilahang balay atol sa pagkahitabo.

Matud pa sa imbestigasyon sa Sibonga Fire Station sukad pa niadtong bulan sa Mayo naputlan na og kuryente ang balay ni Lopez.

Giingong human sa panihapon kauban ang iyang anak nga si Ramonsito, milakaw ang anak sa siyudad aron manukar sa banda.

Ang mga residente sa baybayon mao pay nakapahibalo sa mga bombero nga dunay sunog sa Candaguit tungod kay makita man gikan sa dagat ang kalayo, apan sa ilang pag-abot dako na ang kalayo. Gidudahan nga ang kandila maoy hinungdan sa maong sunog. (/EIM)(BANAT NEWS)