CEBU, Philippines - Duha ka mga tawo ang nangapriso tungod sa “bomb joke” sulod sa pangpublikong lugar ilabi na sa pantalan kay miresulta kini sa kalisang sa mga pasahero.
Niadtong milabay’ng gabii, usa ka Charito Abao, 40, ang gidakop sa Port Police sa Pier 4, human nga gireklamo sa mga pasahero nga nanghulga kining dunay bomba. Nasayran nga si Abao nga taga lungsod sa Hubangon sa Camiguin, mosakay unta og barko pauli sa ilang lugar nianang gabhiuna apan giingong gihasolan kini sa kadugay sa inspeksyon sa mga bagahe.
Matud pa ni Atty. Evan Epe ang Officer In-Charge sa Intelligence and Investigation Section sa Cebu City Port Terminal nga nagkagubot sulod sa terminal human nga misinggit si Abao nga “bantay kay naay bomba diha!”
Tungod sa gibuhat ni Abao, nangahadlok ug nagkatibulaag ang mga pasahero ilabi na ang mga tiguwang ug mga bata aron makapalayo sa lugar.
Nagduda si Epe nga gihasolan na si Abao sa security check nga gihimo sa pantalan human nga gimandoan kini nga ipabutang sa x-ray machine ang iyang dala nga bag. Si Abao gitanggong na sa Waterfront Police Station.
Gawas ni Abao, usa sab ka lalaki nga hubog ang gisikop diha sa Pier 3 sa miaging gabii human nga misinggit nga duna kini dala nga bomba. Ang maong lalaki giila nga si Jimboy Feloche, 24, taga Barangay Fausto, Baybay, Leyte. Hinuon si Feloche human napasakaan og kaso, mibutang dayon og P16 mil nga piyansa.
Gipanawagan ni Epe ang katawhan nga di mohimo og susamang mga komedya ilabi na sa pangpublikong lugar. Lakip sa gidili sa balaod ang pagkomedya nga dunay sunog, linog ug uban pa nga makapalisang sa katawhan.
Kasong paglapas sa Presidential Decree 1727 kon “Declaring as unlawful the malicious dissemination of false information of the willful making of any threat concerning bombs, explosives or any similar device or means of destruction and imposing penalties thereof.” (BANAT NEWS)