CEBU, Philippines- Gibutyag sa Department of Environment and Natural Resources (DENR-7) nga di mominus lima ka Environmental Compliance Certificate(ECC) ang nalapas sa Cebu TH Poultry House Corporation (CTHPHC) may labot sa pagdagsa sa mga langaw ug nanimaho ang Barangay Bago sa lungsod sa Asturias human sa gihimong inspeksyon sa Environmental Management Bureau (EMB-7) sa DENR-7. Sa suwat nga gipirmahan ni EMB-7 Regional Director William Cuñado niadtong Agosto 1 nga gipadangat ngadto kang Warren Hing, kini naghisgot labot sa mga kalapasan nga nahimo sa poultry farm.
Usa niini ang wala pagbutang og mga mitigating measures aron dili mosanay ang mga langaw, wa sila’y gisumitir nga work ug financial program sa seedling production ug tree planting activities sud sa usa ka buwan.
Wa usab kini mokuha og permit aron maka-operate og generator set, wala usab sila’y discharge permit sa hugaw ug wa usab waste treatment facility.
Tungod niini, usa ka technical conference ang gikatakda nga ipahigayon karong Agosto 8 sa EMB-7 Conference Hall, sa Barangay Banilad, siyudad sa Mandaue ug gipaabot nga motambong niini si Asturias Mayor Alan Adlawan ug Barangay Bago Kagawad Liziel Cayson.
Ang makalapas sa Presidential Decree 1586 o Establishing an Environmental Impact Statement System, kun mapamatud-an nga dunay nahimong kalapasan posible mapahamtangan sila og silot nga pagkasuspenso, pagkanselar ug mobayad og di mominus P50 mil nga multa. Ang EMB-7 miisyu og ECC sa CTHPHC niadtong Septiyembre 18, 2013 bugti sa pagtuman sa mga rekisitos. - /EIM) (BANAT NEWS)