CEBU, Philippines- Mokabat sa P150 mil ang gibiling danyos sa sunog nga miulbo sa may dalan V. Rama, Englis, Guadalupe, dakbayan sa Sugbo pasado alas 6 niadtong Sabado sa gabii.
Ang sunog giingong nagsugod sa ika-duhang andana sa panimalay ni Edelina Dy.
Matud ni SFO1 Emelliano Daño, imbestigador sa Bureau of Fire Protection (BFP), nga duha ka balay ang na-ugdaw ug duha usab ang partially damaged atol sa maong sunog nga miabot sa second alarm.
Sumala pa nga kalit lang usa ka baga nga aso ang nakita sa mga tawo gikan sa lawak sa ikaduhang andana sa balay ni Dy ug gisundan sa pagbuga sa kayo hinungdan nga dali sila nga mitawag sa kabomberohan. Alas 6:45 nadawat sa kabomberohan ang alarma sa maong sunog ug alas 7:10 gideklarar nga under control. Wala’y gikataho nga naangol apan nakamugna kini og paghuot sa dagan sa trapiko sa maong lugar. Posibleng electrical misuse o gikan sa linya sa kuryente ang sinugdanan sa sunog nga padayon pa nga gisubay sa kabomberohan sa ilang imbestigasyon. - /GMR) (BANAT NEWS)