CEBU, Philippines- Gisakmit sa kapolisan sa Carbon Police Station ang laing walo ka video karera machines sa gihimong pagpangronda sa barangay Ermita, dakbayan sa Sugbo sa niaging gabii.
Kini pinasikad sa mando ni Chief Insp. Noel Lomente, hepe sa Carbon Police, nga hingusgan gyud ang kampanya batok ilegal nga sugal.
Hapon sa niaging adlaw nagsugod paglibot ang kapolisan sa maong barangay tungod sa taho nga dunay mga video karera nga nag-operate sa lugar.
Gisuhid sa kapolisan ang lugar hinungdan sa pagkasakmit sa walo ka video karera sa nagkalainlaing bahin sa barangay.
Nanawagan ang hepe sa Carbon Police sa mga residente o bisan kinsa nga may mga kasayuran sa operasyon sa video karera nga mobisita sa ilang buhatan o dili ba motawag sa ilang estasyon aron ilang maaksiyonan. Sumala pa ni Lomente nga pwede ang bisan kinsa nga may kasayuran ang moadto sa iyang buhatan ug itudlo asa dapit ang mga video karera machines aron ila kining masakmit. Sulod lang sa duha ka semana nakadakop na og napulo ka video karera ug moli-moli ang kapolisan sa maong lugar. - /GMR) (BANAT NEWS)