CEBU, Philippines - Naalarma ang Department of Health sa halos siyento porsiyentong pagsaka sa gidaghanon sa nataptan og tipdas sa Central Visayas karong tuiga itandi sa niaging tuig.
Si Rennan Cimafranca sa Regional Epidemiology and Surveillance Unit (RESU-7) nitug-an nga niabot og 1,065 ka kaso ug pito ang patay sa tipdas ang natala karon sa ilang buhatan niining tuiga nga mas taas og 91.4 porsiyento sa gidaghanon sa kaso sa niaging tuig gikan sa Enero hangtud sa Hulyo nga nikabat lang og 92 ka kaso ug wala’y namatay.
Matud ni Cimafranca nga kini ang hinungdan nga ilang hingusgan ang pagpangbakuna sa kabataan karong Septiyembre.
Nasayran usab nga sagad sa nataptan og tipdas ang kabataan nga wala’y bakuna.
Si Cimafranca nagkanayon nga gisugdan na nila ang pagbutang og mga vaccine sa tipdas sa mga barangay health centers sa Sugbo ug ubang probinsiya sa rehiyon.
Base sa record, 10 ka nag-unang lugar nga daghan og kaso sa tipdas sa Central Visayas ang mga dakbayan sa Sugbo nga may 390 ka kaso ug usa ang patay; Lapu-Lapu nga may 125; Mandaue nga may 96; Talisay may 95; lungsod sa Balamban may 40; dakbayan sa Dumaguete may 30; Loon, Bohol may 26; Asturias may 23, Liloan may 22 ug Minglanilla may 19 ka kaso. (/GMR)(BANAT NEWS)