CEBU, Philippines - Duha ka babaye ang naluwas gikan sa kamot sa ilang mga amo human sila gimolestiya ug gidaugdaog niini diha sa Sitio Bagakay, Barangay Tayud, Consolacion sa miaging semana.
Ang mga biktima nga nag-edad og 19 ug 33 pulos taga-Barangay Libis, Calapan City, Mindoro, nakakita og higayon sa pag-ikyas inabagan sa usa ka retiradong polis nga si Rex Judaya niadtong Hulyo 24 sa hapon.
Si Judaya na ang mi-turn over sa biktima ngadto sa Consolacion police. Matud ni PO1 Marivic Pepito, Women’s and Children’s Desk officer, nga ang mga biktima na-recruit sa magtiayon isip katabang sa ilang duha ka anak adtong Hunyo 20 sa miaging tuig.
Ang magtiayon misaad pa nga sweldohan og P1,800 matag buwan ang duha ug paeskwelahon sila sa kolehiyo, apan pulos lang diay kini saad kay makadaghang higayon silang nagbalhin-balhin og pinuy-anan kauban sa magtiayong suspek.
Sumala pa sa mga biktima giuban-uban og puyo sila sa mga suspek didto sa Manila , sa Davao City, Mandaue City ug karon sa Consolacion.
“Mura man gud og duna silay gitaguan maong sige og balhin-balhin og puyo unya grabe ang “slavery” kay hugaw ang banyo deduct P50, hugaw ang bintana deduct na pud P50 hangtud wala nay mabilin para ilaha,” matud ni Pepito kinsa midugang nga makausa lang nakadawat ang mga biktima og sweldo sukad nga sila gi-hire sa duha.
Nahibaw-an usab nga gilugos sa lalaking amo ang 19-anyos duha ka higayon. Sumala pa nga nagplano na usab mamalhin ang duha hinungdan nga nangita og paagi ang duha nga makaikyas.
Kasong human trafficking , rape, acts of lasciviousness ang ipasaka batok sa duha. (BANAT NEWS)