CEBU, Philippines - Nalandig sa tambalanan ang usa ka lalaki human gitigbas sa sulod sa panimalay sa usa ka konsehal sa barangay Campusong, lungsod sa Borbon niadtong Lunes sa hapon.
Giila ang biktima nga si Rodulfo Bentazal, 65, samtang giila usab ang suspetsado nga si Rodrigo Dinoy, 51, pulos nagpuyo sa sitio San Vicente sa maong lugar.
Matud ni PO1 Harold Catulpos sa Borbon Police Station nga nahinabi sa Banat News nga samtang ang biktima mibisita sa panimalay ni Konsehal Isagani Montejo kalit lang miabot ang suspetsado nga nagdala og sundang ug gitigbas si Bentazal.
Daling gisagang sa konsehal ug iyang igsuon nga barangay tanod nga si Elizar Montejo ang suspetsado ug gidakop pinaagi sa citizen’s arrest.
Dugang pa ni Catulpos nga dugay na nga may personal nga panagbikil ang duha nga miresulta sa pagpanigbas.
Nakaangkon og samad tinigbasan ang biktima sa tuo nga nawong ug lain-laing bahin sa ulo.
Daling gidala sa Juan Dosado Memorial District Hospital sa Sogod si Bentazal apan gibalhin kini sa Vicente Sotto Memorial Medical Center.
Kasamtangang gitanggong sa detention cell sa Borbon Police Station ang suspetsado ug gi-andam na sa kapolisan ang kasong frustrated murder nga ipasaka batok sa suspetsado. - /GMR) (BANAT NEWS)