CEBU, Philippines - Patay ang usa ka graphic artist nga nagsakay og traysikad dihang kalit lang gipusil sa nagsakay og motorsiklo nga lalaki sa barangay San Miguel, lungsod sa Cordova alas dos pasado sa hapon niadtong Biyernes. Si SPO1 Larry Wagwag sa Cordova Police Station miila sa biktima nga si Jesson Branzuela del Rosario, 35-anyos, taga Purok 5 sa maong barangay.
Ang traysikad nga gisakyan sa biktima niadtong higayuna gimaneho ni Geronel Tirol nga nagpuyo usab sa maong dapit.
Matud ni Wagwag nga ang biktima dali nga gihatud sa mga sakop sa pamilya sa Lapu-Lapu City Hospital apan gideklarar kining dead on arrival.
Si Wagwag miingon nga sa crime scene ilang nakaplagan ang duha ka mga kabhang sa kalibre .45 nga ilang gituohang gikan sa armas nga gigamit sa pagpusil sa biktima. Dugang pakisusi ang himoon sa kapolisan aron pagsuta sa motibo sa maong pagpamusil ug pag-ila sa mga mamumuno. (BANAT NEWS)