CEBU, Philippines - Mga masuso nga gipanganak sugod alas-12 sa tungang gabii kagahapon hangtud sa alas-12- kaganihang tungang gabii malakip sa pilian sa makasaysayanong pagsaulog sa ‘100-millionth citizen’ dinhi sa nasud.
Dinhi sa dakbayan sa Sugbo, dunay tulo ka masuso ang natala atol ning pagsuwat sa balita base kini sa record sa Cebu City Medical Center kon CCMC. Pinaagi sa normal delivery, ang tulo ka bata gipanganak nga himsog sa mga mosunod nga oras 2:28 sa kaadlawon, 7:50 sa buntag ug 10:27 sa buntag kagahapon.
Ang tulo ka bata, duha ka lalaki ug usa ka babaye, posibleng malakip sa “Search for the 100 Millionth Baby” nga gipasiugdahan sa Commission on Population (Popcom)-7.
Base sa search guidelines sa Popcom, ang mopasar mao kadtong bata nga gipanganak sa pampublikong tambalan pinaagi sa normal delivery gikan 12:06 sa tungang gabie.
Ang inahan sa batang mananaog makadawat og ‘starter kit for newborn’ nga nagkantidad og P5,000.
Matud ni Grace Jamaluddin Abdul, 24, taga Barangay Ermita, inahan sa bata nga gipanganak kagahapong 7:50 sa buntag, mapasalamaton siya nga gipanganak ang iyang unang anak sa makasaysayanong adlaw.
“Wa koy idea about niini (100-Millionth citizen) pero nalipay g’yud ko,” matud ni Abdul, kinsa atol sa interbyu kaniya sa Banat News wa pa siya makahuna-huna kun unsa iyang ipangalan sa bata.
Sumala sa press statement ni Popcom-7 Director Bruce N. Ragas ang mga bata dako og papel pagpalambo ug kaugmaon sa nasod.
Base sa pangagpas sa Philippine Statistics Authority, tulo ka mga bata ang matawo sa Pilipinas kada minuto.
Apan dunay kabalaka ang mga family planning advocates sa nasud tungod kay ang dako nga populasyon wa magpasabot nga molambo usab ang ekonomiya sa nasud tungod kay mainat ang resources sa usa ka nasud.
Sumala pa ni Ben de Leon, ang presidente sa Forum for Family Planning and Development dili kayahon sa gobiyerno ang paghatag kanila og trabaho kay sa pagkakaron, daghan na gani ang nanarbaho sa ubang nasud.
Giawhag ni De Leon ang gobiyerno nga pangitaan gyud og solusyon ang 26 milyones nga Pilipinong way mga trabaho.
Ang Pilipinas maoy ika-12 sa kalibotan nga dunay labing daghan og populasyon. (BANAT NEWS)