Napulo ka video karera nasakmit sa Ermita

CEBU, Philippines -  Aron sa pagmatuod nga wala magkulang ang kapolisan sa Carbon Police Station sa ilang kampanya batok sa illegal nga sugal nga gihulagway ni Kapitan Felicisimo Rupinta nga mikuyanap sa iyang barangay sa Ermita napulo ka video karera machines ug moli-moli ang gisakmit kagahapon sa hapon.

Si PO3 Antonio Tejero sa Carbon Police nangulo sa maong pagpangronda base sa mando sa hepe nga si Chief Inspector Noel Lomente.

Kahinumduman nga nagpahigayon og ronda ang City Intelligence Branch sa nahisgotan nga barangay di palang dugay.

Apan sumala pa ni Rupinta sa interbyu kaniya sa DyRC niadtong Sabado ug sa Banat News niadtong Biyernes mibalik ra ‘pod dayon og operate ang mga video karera human sa maong raid.

Tungod sa maong report milusad ang Carbon Police Station  og operasyon kagahapon hinungdan sa pagkasakmit sa napulo ka makina sa video karera ug moli-moli.  (BANAT NEWS)