Ginang nadat-ogan sa paril
CEBU, Philippines - Usa ka 39- anyos nga ginang ang naangol human nadat-ogan sa nahugno nga paril nga semento sa Sitio Bas, Barangay Pagsabungan, Dakbayan sa Mandaue alas 6 pasado ang takna sa miaging Biyernes sa gabii.
Si SPO1 Edmund Belacora sa kapolisan sa Presinto 3 sa Mandaue City Police Office (MCPO) miila sa biktima nga mao si Anne Montebon, nagpuyo sa maong dapit.
Matud pa ni Belacora nga ang Emergency Rescue Unit Foundation (ERUF) maoy nag-ugkat sa biktima sa gibanabanang walo ka tiil nga paril nga gipanag-iya ni Engineer Gilbert Calunsag.
Sumala pa ni Belacora nahagsa kini tungatunga sa pagbunok sa uwan ug naatlan nga maoy pag-agi sa ginang diha sa kilid niini.
Ang biktima gidala sa North General Hospital sa Barangay Banilad ug padayon kining giatiman sa mga doktor sa maong tambalanan.
Matud pa ni Belacora mipasalig si Calunsag nga motabang sa galastohan sa biktima sa tambalanan. - /EIM) (BANAT NEWS)
- Latest
