CEBU, Philippines - Ilusad karong Biyernes sa kagamhanan sa dakbayan sa Lapu-Lapu ang ilang branding nga idungan sa awarding sa mga nag-unang tax payers karong tuiga.
Si Mayor Paz Radaza miingon nga milanat og pila ka buwan una nahingpit ang plano gumikan sa ka daghang gi-konsiderar sama sa turismo ug si Datu Lapulapu.
Matud ni Radaza nga tumong sa maong branding ang pagdani og dugang mga investors ug pag-establisar kun unsa ang Lapu-Lapu City. Gidugang sa mayor nga upat ka kolor ang ilang gigamit nga mag-representar sa siyudad nga gilangkuban sa golden yellow, sky blue, persimmon orange ug forest green.
Pasabot sa golden yellow mao ang positive; trustworthy ang sky blue, fun usab ang persimmon orange, ug wealth ang pasabot sa forest green ug ang maong mga kolor nagrepresentar usab sa kinaiya sa mga Oponganon.
Subay niini, ang branding dili lang himoon sa City Hall apan lakip na sa ubang lugar sa siyudad.
Ang mga kawani sa City Hall, mga traysikol ug jeep de pasaheroan apil sa branding samtang ang kapolisan, kabomberohan ug jail officers hatagan og pin.
Aron mas maila pa ang gihimong branding sa siyudad, ang kagamhanan makig-alayon sa mga nagkalain-laing barangay ug mokuha usab sila sa service sa usa ka advertising agency. (BANAT NEWS)