CEBU, Philippines - Human sa pagkahilo sa usa ka pamilya nga gikamatay sa usa ka 7-anyos nga bata, subli nga gipasidan-an sa Bureau of Fisheries and Aquatic Resource (BFAR-7) ang katawhan ilabina sa mga mangingisda nga dili mokaon og butete o boriring.
Matud pa ni BFAR-7 Regional Director Andres Bujos nga kaniadto pa sila nagsige og pasidaan sa publiko nga dili luwas kan-on ang boriring ug butete.
Apan daghang mga tawo ang mangahas sa pagkaon niini tungod sa kakompiyansa o ba kaha tungod sa kakulang sa kasayuran nga kini makalanag. Laing hinungdan mao ang kakabus ug mao ray madali nilang makuha.
Iyang gitataw nga ang labing maapektohan niini mao ang mga gagmay nga bata nga makakaon sa gisud-an sa mga ginikanan tungod sa kahuyang pa sa ilang lawas aron makasugakod sa hilo niini.
Dinhi sa Pilipinas, walay pormal nga training sa mga kusinero aron makat-onan ang hustong paglimpyo sa butete, nakat-onan lang gikan sa mga katiguwangan hinungdan nga duna gyuy aksidenteng mangahilo ug usahay moresulta sa kamatayon.
Sa nasud sa Japan, makadaghang higayon nga gi-ban ang pagkaon niini nga gitawag nila og fugu, apan mao kini ang labing mahal ug sikat kaonon. Tulo ka tuig ang training sa usa ka kusinero aron kini makakuha og lisensiya aron tugotang moluto og butete o boriring. Sumala pa sa Wikipedia, ang butete adunay tetrodotoxin nga hilo nga makita sa atay, ug bato niini, giingon nga 1,200 ka pilo ang lala niini. Ang hilo makaparalisar sa kaunoran samtang ang pasyente hinay-hinay nga mamatay tungod kay di na makaginhawa human mag-agi og panakit sa tiyan ug kalawasan. (BANAT NEWS)