CEBU, Philippines - Gibasura sa Department of Environment and Natural Resources-7 ang hangyo sa Department of Public Works and Highways-7 nga libkason ang pagpahunong pag-ibot sa mga kahoy nga gitanum tunga sa karsada.
Kini bisan pa man og balido ang gihatag nga mga hinungdan sa pagpadayon sa pag-ibot sa mga kahoy sa center island sa dalan Sergio Osmeña, dakbayan sa Sugbo.
Si DPWH-7 Regional Director Ador Canlas nitug-an nga dalion nila ang pag-ayo sa maong dalan alang sa umaabot nga international event sa "Iron Man Triathlon" karong Agosto 3.
Laing rason ni Canlas mao ang pagbisita sa Santo Papa sa Sugbo karong Enero 15, 2015 ug ang ipahigayong Asia-Pacific Economic Cooperation (APEC) Summit sa sunod tuig.
Si Canlas nipasalig sa DENR-7 nga tumanon niini ang tukmang paagi sa pag-ibot sa nagpabiling tanum. Apan giklaro ni DENR-7 Regional Director Isabelo Montejo nga dili mahimong ihiklin lamang ang mga balaud ug lagda sa DENR tungod lang sa maong mga international events.
Matud ni Montejo nga malibkas lang ang iyang giluwatang kamandoan sa higayon nga tumanon sa DPWH-7 ug WT Construction ang paghatag og 7,900 ka mga tanum sa kahoy isip hulip sa nahanaw nga 79 ka punoan nga gibutang sa center island sa giayo karon nga dalan. - /GMR) (BANAT NEWS)