Seminar sa traffic enforcer ug drayber

CEBU, Philippines - Usa ka grupo sa mga drayber og passenger jeepneys miawhag sa kadagkoan sa Traffic Enforcement Agency of Mandaue  (TEAM) nga ang mga abusado nila nga mga sakop pasalmoton og seminar.

Si Greg Perez, lider sa Pinagkakaisang Samahan ng Tsuper at Operators Nationwide (PISTON), miawhag ni Mandaue City Mayor Jonas Cortes nga hatagan og pagtagad ang ilang hangyo.

Matud ni Perez nga angay’ng ayuhon gayud pagpili ang dawaton isip traffic enforcer aron malikayan nga makabaton sila og abusado nga mga sakop nga kusog kaayo’ng mangabuso sa mga drayber.

Dugang awhag sa PISTON ngadto sa mayor mao ang pagpalagpot ni Edwin Ermac isip operation chief  sa TEAM tungod sa iyang hilabihan gayud ka estrikto.

Si Perez miingon nga bisan kun ilang masugatan si Ermac nga mag-jogging unya makakita sa mga drayber sa PUJ nga nakahimo og kalapasan dakpon lang dayon ug manawag pa og traffic enforcer nga deputized sa Land Transportation Office (LTO) aron isyuhan sila og TOP.

Si Romeo Armamento, bise presidente sa National Confederation of Transportworker Union for the Visayas (NCTU), miangkon nga adunay ilang mga drayber nga abusado ug nagkinahanglan usab og seminar ug dili lang magsalig sa seminar  sa LTO. Sa laing bahin si Ermac miingon nga dili siya mobiya sa iyang katungdanan pagpangulo sa TEAM gawas lang kun si  Mayor Cortes maoy mopapahawa kaniya sa katungdanan.

Matud ni Ermac nga ang awhag sa PISTON pagpalagpot kaniya sa katungdanan makapahagit hinuon kaniya nga motrabaho gayud sa pagpahapsay sa kadalanan sa dakbayan.

Gitataw ni Ermac nga gipaningkamotan sa dakbayan nga mahimo’ng business-friendly ang Mandaue maoy hinungdan nga ang tanan nga nagbutang sa ilang patigayon gitabangan gayud nila nga molambo pinaagi sa pagbutang og rota nga moagi sa ilang mga tindahan.

Tumong niini nga modaghan ang mga kustomer sa mao nga mga tindahan. Matud ni Ermac nga kun adunay reklamo batok sa ilang traffic enforcer nga naghimo og abuso angay nga ipadangat dayon ngadto sa iyang buhatan kay kun kapamatud-an dili siya magpanuko pagpahamtang niini og silot.

Apan matud ni Ermac nga dili ikalimod nga daghan sa mga drayber ang gahi gayud pasabton sa mga lagda nga gilatid sa trapiko ug kun madakpan ang traffic  enforcer na hinuon ang mahimong abusado. (BANAT NEWS)