CEBU, Philippines- Usa ka pulis ang nagpositibo sa ginadiling drugas sa gipahigayon nga surprise drug test sa Provincial Intelligence Branch samtang nagpahigayon og Police Intelligence Seminar Biyernes sa hapon.
Sa 48 ka mga pulis nga gikan sa nagkadaiyang police stations, usa kanila ang positibo matud ni Supt. Rodulfo Albotra Jr., PIB chief. Nagpaabot na lang karon ang PIB sa official result sa drug test gikan sa Philippine National Police Crime Laboraotry-7 samtang gitan-aw na nila ang kasong administratiba batok sa maong pulis.
Si Albotra mibalibad hinuon sa pag-ila kung si kinsa ug asa nga police station nadestino ang nagpositibong polis.
Ang PIS seminar nga gipanguluhan sa Regional Intelligence Division ug sa PIB diin ang nagkadaiyang police station adunay representante.
“Continuous na man ni nga seminar unya humana man ang intelligence so magdepende na lang sa hepe kung si kinsa ang ipadala nila,” matud ni Albotra kinsa midugang nga dali niyang gipasirado ang pultahan sa dayong human na sa seminar aron walay bisan usa nga makagawas.
“Nakabantay nako niya pagkahibalo nga mag-drug test kay uneasy kaayo,” matud niya kinsa nagpasalamat sa suporta sa Cebu Provincial Anti-Drug Abuse Council (CPADAC) sa gihatag niini nga mga drug testing kits.
Sa samang adlaw ang PIB mihimo usab og surprise drug test sa Borbon Police Station human sa pagkasikop ni PO2 Bernardito Almieda sa usa ka drug den sa maong lungsod. Apan sa 18 ka mga personnel walay nagpositibo.
Dugang ni Albotra nga ila kining gihimo aron sa paglimpyo sa kapulisan sa probinsiya ug pagsumpo sa mga pulis nga nalambigit sa illegal nga buhat.
“This is to check our personnel not only to those who are protecting and cuddling but especially those who are using illegal drugs,” sigon niini. - /EIM) (BANAT NEWS)