CEBU, Philippines - Makaangkon na unya og libreng sugang dagitabnon ang kabus nga molupyo sa dakbayan sa Talisay.
Giklaro ni Mayor Johnny De los Reyes nga walay bayad ang pagpa-istalar apan ang tag-iya sa balay ang mogasto sa materyales.
Ang kagamhanan sa dakbayan sa Talisay mipahigayon sa “Stream of Light Project” kinsa ang mga indigents maoy makapahimulos niini.
Apan dunay gamay nga kalibog ang mitumaw sa mga nakabenepisyo tungod kay giingong dunay gipabayad sa pagpa-istalar sa ilang linya sa kuryente.
Si De los Reyes miklaro nga kadtong mga indigent libre ang pagpa-istalar apan sila na’y mobayad sa mga materyales nga gamiton sama sa mga wires, switch ug sa suga.
Ang buhatan sa mayor maoy mo-screen sa mo-apply nga magpataud og kuryente kung kini “indigent” ba o dili.
Ang mo-apply duna kini pirmahan nga dokumento ug pangayoan usab og ID picture ug ang buhatan usab sa mayor maoy mohatag og schedule kanus-a moadto ang taga Visayan Electric Company (VECO) sa ilang lugar.
Giklaro usab sa mayor nga dili ang siyudad maoy moabaga sa bayranan sa konsumo sa kuryente sa mga indigent nga nakabenepisyo sa nahisgutang programa.
Dugang ni De los Reyes nga kadtong mga dili indigent nga magpataud og linya sa kuryente ug makig-grupo sa indigent duna kini bayranan nga P100 sa ilang pagpa-istalar. (BANAT NEWS)