CEBU, Philippines - Naaktohan sa mga nag-roving nga kapolisan ang duha ka menor de edad nga nangawat sa suga nga nahimutang sa plaza sa dakbayan sa Toledo.
Nasayran nga padulong na untang dad-on sa mga bata ang tulo ka mga suga alang sa dancing fountain sa maong plaza.
Ang maong suga nagkantidad og tag P15,000 matag usa.
Nasayran nga pila pa lang ka buwan nga gibuksan ang maong plaza sa publiko diin adunay dancing fountain nga makalingaw sa tumatan-aw gumikan sa nagkadaiyang kolor sa suga. Matud ni PO1 Emmanuel Aragon sa Toledo City Police Station nga anaa na sa ilang buhatan ang maong mahalon nga suga.
Samtang gidala na sa Women and Children’s Section ang duha ka menor de edad alang sa dugang imbestigasyon.
Gikatakda usab nga dad-on sa Department of Social Welfare and Development ang maong mga bata. (BANAT NEWS)