CEBU, Philippines - Gipalihok ang Sister City Commission sa dakbayan sa Sugbo aron makatabang pagpangolekta og pundo gikan sa gawas sa nasud alang sa pagpatukod sa Cebu City Medical Center (CCMC).
Ang SSC nga gipangulohan ni kanhi kongresista Antonio “Tony” Cuenco gitukod aron pagpalig-on sa koneksyon sa dakbayan ngadto sa lain-laing mga siyudad gawas sa nasud lakip na sa Pilipinas.
Ang dakbayan sa Sugbo may mga sister cities na sa Estados Unidos, Uropa ug uban pang nasud. Gihulagway ni Rudy Villanoboz, kanhi pangulo sa Protocol Office sa City Hall nga daghan gyud og natabang ang sister cities.
Apan giklaro ni Cuenco nga wala nangayo ang dakbayan sa Sugbo apan gipakita sa plano diin agresibo silang motabang.
Matud ni Cuenco nga ilang tinguha nga makatigum og P5 bilyones alang sa state-of-the-art nga CCMC.
Gilantaw ni Cuenco ang bag-ong CCMC nga mas nindot kaysa sa karaan ug mamahimong usa ka hospital alang sa tanan nga kompleto sa kahimanan. (/GMR)(BANAT NEWS)